ದೇವರನಾಮ: ವಾದಿರಾಜಮುನಿಪ ಹಯಮುಖ

ರಚನೆ: ಶ್ರೀ ಗೋಪಾಲ ದಾಸರು

ರಾಗ: ಖರಹರಪ್ರಿಯ

ತಾಳ: ಆದಿ

ವಾದಿರಾಜಮುನಿಪ ಹಯಮುಖ

ಪಾದಕಮಲ ಮಧುಪ                ||ಪ||

ನೀ ದಯದಲಿ ತವಪಾದಧ್ಯಾನವನು

ಆದರದಲಿ ಕೊಟ್ಟಾದರಿಸೆನ್ನನು            ||ಅ ಪ||

ಮೂಷಕಬಿಲದಿಂದ ಉದರ ಪೋಷಕ ಬರಲಂದು

ವಾಸುಕಿ ಭಯದಿ ನಿಮ್ಮಾಸನದೆಡೆ ಬರೆ

ಕ್ಲೇಶ ಕಳೆದು ಸಂತೋಷಗೈಸಿದೆ                ||೧||

ಮುಂದೆ ಭೂತನರನ ಪ್ರೇರಿಸಿ ಹಿಂದೆ ಒಬ್ಬ ನರನ

ನಿಂದರಿಸಿ ಆನಂದದಿಂದ ಜನ-

ವೃಂದ ನೋಡುತ್ತಿರೆ ಅಂದಣ ನಡೆಸಿದ್ಯೊ            ||೨||

ಶಾಸ್ತ್ರ ಪ್ರಸಂಗದಲಿ ನಾರಾಯಣಭೂತರ ಗೆಲಿದಲ್ಲೆ

ಖ್ಯಾತಿಯಿಂದ ಬಹು ಮಾತನಾಡಿ ಶ್ರೀ-

ನಾಥನ ಮಂದಿರ ಪ್ರೀತಿಲಿ ತರಿಸಿದ್ಯೊ                ||೩||

ತುರಗವದನ ಪಾದ ಭುಜ(ದಲಿ)ಗಳಲಿ

ಧರಿಸಿಕೋಂಡು ಮೋದ ಕಡಲೆಮಡ್ಡಿಯನು

ಕರದಿಂದುಣಿಸಿದ ಗುರುವರಶೇಖರ            ||೪||

ಆ ಮಹಾ ಗೋಪಾಲವಿಠಲ ತಾಮರಸದಳಗಳ

ಧೀಮಂತರಿಗೆ ಸುಕಾಮಿತವನು ಕೊಡುವ

ಆ ಮಹಾಮಹಿಮ                        ||೫||