ರಾಮ ಮಂತ್ರವ ಜಪಿಸೊ

ಶ್ರೀ ಪುರಂದರ ದಾಸರು

ರಾಗ: ಮಧ್ಯಮಾವತಿ

ತಾಳ: ಆದಿ

 

ರಾಮ ಮಂತ್ರವ ಜಪಿಸೊ ಹೇ ಮನುಜ     ||ಪ||

 

ಆ ಮಂತ್ರ ಈ ಮಂತ್ರ ನೆಚ್ಚಿ ನೀ ಕೆಡಬೇಡ |

ಸೋಮಶೇಖರ ತನ್ನ ಭಾಮಿನಿಗೊರೆದಿಹ ಮಂತ್ರ        ||ಅ ಪ||

 

ಕುಲಹೀನನಾದರು ಕೂಗಿಜಪಿಸುವ ಮಂತ್ರ |

ಸಲೆ ಬೀದಿಯೊಳು ಉಚ್ಚರಿಪ ಮಂತ್ರ ||

ಹಲವು ಪಾಪಂಗಳ ಹದೆಗೆಡಿಸುವ ಮಂತ್ರ |

ಸುಲಭದಿಂದಲಿ ಸ್ವರ್ಗ ಸೂರೆಗೊಂಬುವ ಮಂತ್ರ         ||೧||

 

ಮರುತಾತ್ಮಜ ನಿತ್ಯ ಸ್ಮರಣೆ ಮಾಡುವ ಮಂತ್ರ |

ಸರುವ ಋಷಿಗಳಲ್ಲಿ ಸೇರಿದ ಮಂತ್ರ ||

ದುರಿತಕಾನನಕಿದು ದಾವನಲ ಮಂತ್ರ |

ಪೊರೆದು ವಿಭೀಷಣಗೆ ಪಟ್ಟಗಟ್ಟಿದ ಮಂತ್ರ         ||೨||

 

ಜ್ಞಾನನಿಧಿ ನಮ್ಮ ಆನಂದತಿರ್ಥರು |

ಸಾನುರಾಗದಿ ನಿತ್ಯ ಸೇವಿಪ ಮಂತ್ರ ||

ಭಾನುಕುಲಾಂಬುಧಿ ಸೋಮನೆನಿಪ ನಮ್ಮ |

ದೀನರಕ್ಷಕ ಪುರಂದರ ವಿಠಲನ ಮಂತ್ರ |        ||೩||