ಏನಾಯಿತೊ ಈ ಜನಕೆ

ರಚನೆ: ಶ್ರೀ ಪುರಂದರ ದಾಸರು

ರಾಗ: ಬಿಲಹರಿ

ತಾಳ: ಆಟ

 

ಏನಾಯಿತೊ ಈ ಜನಕೆ |

ಮೌನವನು ಹಿಡಿದು ಮರೆತರು ಹರಿಯ        ||ಪ||

 

ನಾಲಿಗೆ ಮುರಿದಿತೊ ನೆಗ್ಗಿನ ಕೊನೆಮುಳ್ಳು |

ಬಾಲಕತನದಿ ಭೂತ ಹಿಡಿಯಿತೊ ||

ಮೇಲೆ ಕೆಲೆಗಿನ ತುಟಿ ಎರಡು ಒಂದಾಯಿತೊ |

ಕಾಲಮೃತ್ಯುವು ಬಂದು ಕಂಗೆಡಿಸಿತೊ        ||೧||

 

ಘಟಸರ್ಪ ಕಚ್ಚಿ ವಿಷ ಘನವಾಗಿ ಏರಿತೋ |

ಕಟಕರಿಸಿ ನಾಲಿಗೆ ಕಡಿದ್ಹೋಯಿತೋ ||

ಹಟದಲ್ಲಿ ಹರಿಯನ್ನು ನೆನೆಯದೆ ಇರುವಂಥ |

ಕುಟಿಲ ಚಂಚಲ ಮನಸು ಕೂಡಿ ಬಾಧಿಸಿತೊ        ||೨||

 

ಹರಿಯೆಂದರಿವರ ಶಿರ ಹರಿದು ತಾ ಬೀಳುವುದೆ |

ಹರಿನಾಮ ಹಣೆಯಲ್ಲಿ ಬರೆದಿಲ್ಲವೆ ||

ವರದ ಪುರಂದರವಿಠಲರಾಯನ್ನ |

ಸ್ಮರಿಸಿದರೆ ಸಿಡಿಲೆರಗಿ ಕೊಲ್ಲುವುದೇ            ||೩||